2022-2026 жылдарға арналған APEMS даму стратегиясын іске асыру шеңберінде APEMS және Оңтүстік Кореяның жетекші спорт университеттері арасында академиялық ынтымақтастық туралы келіссөздер жүргізілді. Оңтүстік Кореяның спорт университеттері мамандандырылған бағдарламалар, заманауи инфрақұрылым, дарынды спортшыларды қолдау бағдарламалары, кәсіби командалармен және ұйымдармен ынтымақтастық, медициналық қолдау, спорт саласындағы ғылыми-зерттеу жұмыстары секілді білім беру және спортты дамыту саласында оларды ерекше ететін бірқатар қасиеттерге ие. Осыған орай, APEMS Халықаралық ынтымақтастық бөлімінің меңгерушісі Дина Сапарова Оңтүстік Кореяның дене шынықтыру және спорт саласы бойынша мамандарды дайындайтын жетекші университеті саналатын КОРЕЯ ҰЛТТЫҚ СПОРТ УНИВЕРСИТЕТІНЕ, сондай-ақ Оңтүстік Корея университеттерінің ұлттық рейтингінде бірінші орында тұрған, құрылымында дене шынықтыру және спорттық білім беру бағыты бойынша сәтті жұмыс істейтін СЕУЛ ҰЛТТЫҚ УНИВЕРСИТЕТІНЕ іссапармен барды.
2023 жылы 22 желтоқсанда Сеул ұлттық университетінің халықаралық байланыстар департаментінің директоры Сунгжу Пак ханым, дене шынықтыру және спорт департаментінің қызметкерлері; Вуджин Корей ұлттық спорт университетінің халықаралық шарттар бойынша кураторы Ли ханым секілді университеттердің халықаралық бөлім басшыларымен және өкілдерімен кездесулер өтті. Кездесу барысында студенттер мен оқытушылардың академиялық ұтқырлығы, корей ғалымдарының APEMS негізінде дәрістер оқып, мастер-класс өткізуі, бірлескен ғылыми зерттеулер жүргізу салаларындағы ынтымақтастық мүмкіндіктері талқыланды.
Оңтүстік Кореяның спорт университеттерінің спорт саласындағы білім беру қызметінде көп жылдық тәжірибесі бар, сондықтан біз университеттер арасындағы спорттық білім мен ғылымды дамыту игілігі үшін ұзақ мерзімді және жемісті ынтымақтастыққа үміттенеміз.
